ភ្នំពេញ៖ ប្រធានគណបក្សខ្មែរក្រោកលោក សុខ សុវណ្ណវឌ្ឍនាសាប៊ុង ហៅវីល្លាម គ័ង បានសារភាពថាលោកបានរៀបគម្រោងប្លន់ចំនួន២ដងរួចហើយតែលើកទីមួយមិនបានសម្រេចទើបតែបានសម្រេចនៅលើកទី២នេះ។ លោកថាមូលហេតុដែលរៀបគម្រោងប្លន់គឺដោយសារលោកខ្វះខាតលុយកាក់ជំពាក់បំណុលគេជុំទិស និងជ្រិញអ្នកមានឡាយតាម Facebook បង្អួតទ្រព្យសម្បត្តិ។

យោងតាមការចុះផ្សាយលើហ្វេសបុកផ្លូវការរបស់កងរាជអាវុធហត្ថរាជធានីភ្នំពេញបានចុះផ្សាយ៖ «សកម្មភាពប្លន់ចំនួន០២ លើកទី១គឺនៅថ្ងៃទី២៥ ខែវិច្ឆិកា ឆ្នាំ២០២១ បានធ្វើសកម្មភាពប្លន់ ម្ចាស់បុរីម៉នដានី នៅស្រុកគងពិសី ខេត្តកំពង់ស្ពឺ តែមិនបានសម្រេច ព្រោះនៅថ្ងៃធ្វើសកម្មភាព ស្រាប់តែជនរងគ្រោះមិនបាននៅក្នុងឡានដែលពួកខ្លួនបានកាក់ប្លន់ ក៏ក្លែងធ្វើជាសួរនាំក្នុងនាមសមត្ថកិច្ច ហើយពេលនោះខ្លួនមិនបានចូលរួមទេ គឺឲ្យតែកូនចៅ ០៥នាក់ អាវុធវែង០១ដើម អាវុធខ្លី០២ដើម និងក្លែងឯកសណ្ឋានសមត្ថកិច្ច ចុះទៅធ្វើសកម្មភាព។ ទី២គឺនៅថ្ងៃទី១៩ ខែធ្នូ ឆ្នាំ២០២១ ខ្លួនបានប្រើរូបភាពដូចលើកទី១ដែរ គឺក្លែងឯកសណ្ឋានសមត្ថកិច្ច និងក្លែងដីកាបង្គាប់ឲ្យនាំខ្លួន ចុះទៅធ្វើសកម្មភាព ប្លន់យកទ្រព្យសម្បត្តិ នៅផ្ទះអ្នកឡេអនឡានឈ្មោះ អ៊ាន សៀវម៉ី បានសម្រេចដោយប្រមូលបានគ្រឿងពេជ្រមួយចំនួន» ។

លោក សុខ សុវណ្ណវឌ្ឍនាសាប៊ុង ហៅ William Guang ត្រូវកម្លាំងកងរាជអាវុធហត្ថឃាត់ខ្លួនក្នុងផ្ទះនៅបុរីមួយផ្លូវ៦០ម៉ែត្រ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ជាមួយមនុស្ស១១នាក់ផ្សេងទៀតកាលពីយប់ថ្ងៃទី២០ ខែធ្នូ។

ការឃាត់ខ្លួនគឺតែមួយថ្ងៃបន្ទាប់ពីការប្លន់ឧកញ៉ា អ៊ាន សៀវម៉ី កាលពីថ្ងៃទី១៩ ខែធ្នូ យកបានខ្សែកពេជ្រធំៗចំនួន៣ខែ និងគ្រឿងអលង្ការមួយចំនួនទៀតដែលសរុបជាទឹកប្រាក់ប្រហែល ១,៦លាន ទៅ១,៩ លានដុល្លាអាមេរិច និងទូរស័ព្ទដៃម៉ាក Iphone ចំនួន ២គ្រឿង៕